Ang Magkatandem sa Buhay







Friends forever



Ang tunay na kaibigan at pagkakaibigan ay tumatagal panghabangbuhay habang ang mundong ating ginagalawan ay patuloy sa kanyang pag-inog.

Laging magkaugnay ang salitang magkaibigan at pagkakaibigan. Kumbaga lagi silang partner o tandem. Ngunit para sa ating mga kabataan ano ba ang ating pakahulugan sa dalawang salitang ito.

Ang kaibigang tunay ay mahirap mahanap sa panahon ngayong humaharap ang lahat sa kahirapan at krisis. Hindi natin alam kung kanino tayo magtitiwala. Ngunit alam ba ninyong ang mga taong ito ay nabubunggo na natin ng hindi natin alam. Nakakasalamuha na pala natin sa ating pang araw-araw na buhay ngunit hindi lang natin alam na sila na pala ang mga taong dadamay sa atin sa oras na kailanganin natin sila. May mga pagkakataon namang  akala mo’y pagka sungit-sungit yun pala ay may natatagong kabaitan sa loob ng kanyang puso.

Alam ba ninyong ang kaibigan ay hindi hinahanap, sa halip pagkakataon mismo ang humahanap nito para sa atin. Kusa itong dumarating at dumadamay sa mga oras ng kagipitan, kalungkutan, problema at sa panahong akala mo’y nag-iisa ka dito sa mundong ibabaw at pasan-pasan ang problema ng lahat ng tao sa mundo. Sila ang mga taong karaniwan mong nakakasama at nakakasalamuha. Sila ang tipo ng taong iniingatan ka, pinahahalagahan at tinatanggap ka sa kung ano man ang tunay mong pagkatao. Handa sila sa lahat ng bagay at oras na kailanganin ang tulong nila, at sa mga oras ng iyong pagbabago. Sila rin ang mga taong nagpapaligay at nagpapatawa sayo sa oras na ikaw ay nalulungkot.





Ang samahan na unti-unting nabubuo sa pagitan ninyong magkakaibigan ay tinatawag na pagkakaibigan. Unti-unti itong umuusbong at lumalago sa mga oras na kayo ay magkakasama at nagkakaroon ng panahong magbonding. Ang pagsasamahang ito ay lalo pang pinatitibay ng mga pagsubok na inyong nalalampasan ng sama sama. At ang mga pagsubok na inyong nalampasan ay nagpapatubay ng pundasyon ninyo upang lalo pang tumagal ang samahan ng bawat isa sa inyo.



Ganyan ang pakahulugan naming mga kabataan sa salitang kaibigan at pagkakaibigan. Ito ay isang interaksyon sa pagitan ng mga magkakakilalang tao sa mundong ibabaw na kung saan kayo ay nagkakaintindihan at nagkakaunawaan sa bawat problema ninyo sa buhay.